Naikeddeng a maiyawid iti Pilipinas ti 149 nga Overseas Filipino Workers wenno OFW manipud iti Riyadh, Saudi Arabia, inton Oktubre 20.
Basar iti Overseas Workers Welfare Administration wenno OWWA, pakairamanan kadagiti mapagawid ket dagiti Overseas Filipino Workers nga adda iti Bahay kalinga, agtrabtrabaho manipud iti Saudi recruitment agencies, ken dagiti stranded nga OFW a temporario nga agnanaed kadagiti hotel.
Sumagmamano kadagitoy ket naapektaran ti kanselasion ken pannakaitantan kadagiti biahe ti erpoplano kageddan ti insidente iti King Khalid International Airport iti Riyadh.
Mainaig iti daytoy, nangiwayat pay ti pre-flight orientation ti OWWA Riydh idi Oktubre 16 tapno ilawlawag ti proseso ti panagawid, kasapulan a dokumento, ken dadduma pay a panagsagsagana sakbay ti flight dagitoy.
Mausar iti repatriation ti supplemental Emergency Repatriation Fund iti babaen ti Unified Package for Livelihoods, Industry, Food, and Transport wenno UPLIFT program.
