LAOAG CITY – Umaboten iti 4.07 million metriko tonelada ti naangkat a bagas ti pagilian sakbay pay ti umay ti nakaro nga epekto ti El Niño.
Basar daytoy ti opisial a datos manipud iti Bureau of Plant Industry.
Nangatngato daytoy ti 20.06% kumparar iti 3.39 million metriko tonelada a nairekord iti napalabas a panawen.
Mainaig iti daytoy, agtalinaed a kangruaan a pagalaan ti bagas ti pagilian ket ti Vietnam a nangsuplay ti 2.73 millon metriko tonela a sinaruno ti Thailand ken Myanmar kabayatan a sumarsaruno iti Cambodia, Pakistan, India, South Korea, Japan, ken Italy.
Kabayatanna, umabot met iti 5 million metriko tonelada ti pakabuklan a naangkat a bagas iita a tawen. Daytoy ket tapno maprotehiran ti local buffer stock kontra iti pangta ti El Niño.
Nupay kasta, basar iti Daily Price Index ti Department of Agriculture, umaboten iti P60.74 kada kilo ti imported special rice, kabayatan a ti premium rice adda iti sumurok P55.
Ti well-milled rice ket agpresio ti sumurok P48 ken ti regular milled rice ket adda iti sumutok P45 kada kilo.
