LAOAG CITY – Naibunong ti naruay nga agricultural inputs kas ti makinarya ken dagiti abono, seedlings, ken Livelihood assistance para kadagiti mannalon ken mangngalap ditoy siudad ti Laoag.
Segun kenni Engr. Shiela Opelac, mangidadaulo iti City Agriculture Office, nakaawat dagiti mannalon ken mangngalap ti emergency assistance nga aggapu iti Emergency Assistance Program iti lokal a gobierno pakairamanan iti Organic Fertilizers nga aggapu iti Soil Restoration Program a pangkontra iti epekto ti pangta ti El Niño.
Kuna na nga adda pay dagiti Livelihood equipment a para kadagiti mannalon nga adda ti bassit a negosyo na.
Naipaay pay ti tallo a fully-equipped hand tractors para iti tallo a barangay nga agkasapulan kadagitoy.
Malaksid kadagitoy ket naibunong py iti 1,519 nga hybrid rice seedlings para kadagiti rice farmers babaen iti pondo nga aggapu iti Department of Agriculture (DA).
Kabayatanna, kuna ni Opelac a dagiti naibunong ket paset ti tulong nga ipapaay ti lokal a gobierno.
Innayon na a kadagiti sumarsaruno nga aldaw ket agbalin ton ti Agriculture Sector a Modernized Agriculture tapno al-alisto a panagasenso dagiti mannalon ken mangngalap ditoy siudad ti Laoag.
