LAOAG CITY- Ipaima iti prosecution panel iti Office of the Ombudsmnan dagiti ebidensia a naipresentar kontra ken ni Vice President Sara Duterte iti Senate impeachment court tapno mausar ti agtultuloy nga imbestigasion nga adda pakainaiganna iti posible a panagsungbat ti kriminal.
Segun ken ni House prosecutor Joel Chua, karaman kadagiti rekord a naisumitir kadagiti ebidensia para iti Article I a mangtaltalantan ti confidential funds, Article III nga adda pakainaiganna ti Bribery, ken Aricle IV a grave threats no sadino dagitoy ket karaman kadagiti artikulo nga inikkat iti panagdengngeg iti Senate impeachment court.
Kuna ni Chua a sumursurotda laeng iti kiddaw ni Ombudsman Jesus Crispin Remulla nga isubmitir dagiti dokumento ken rekord mainaig iti kwestionable a panagusar kadagiti maipagarup a confidential funds ti Bise Presidente.
Kabayatanna, kalikagum ti Ombudsman ti naun-uneg pay ti imbestigasion kalpasan nga inbasura ti Comission on Audit (COA) ti Motion for reconsideration ti kampo ni Duterte iti P73.287 a milyon a disallowed confidential expenses idi Disyembre 2022 a naibilin nga isubli.
Iti Ruling ti COA, kinunada nga adda ti maipagarup a panagkurang kadagiti resibo ken dadduma pay a dokumento para kadagiti nagastos.
Maimbestigaran pay ni Duterte mainaig iti maipagarup a saan nga umno a panagusar iti P612. 5 a milyon a confidential funds iti opisina ti Bise presidente ken iti Department of Education.
Inpaganetget ni Chua a ti panangibabawi iti maipapan ti confidential funds iti impeachment trial ket saanna kayat a saw-en nga isardengen iti panagpasungbat kadagiti alegasion ti saan nga umno a panagusar ti pondo ti gobierno ken dadduma pay nga adda ti pakainaiganna ti kaso.
