LAOAG CITY – Agtultuloy ti pannakaisayangkat ti imbestigasion dagiti otoridad mainaig iti napasamak a vehicular traffic incident a nakatayan ti maysa a maladaga ditoy siudad ti Laoag.
Dayta ti inbatad ni Police Staff Sargeant Alexon Rosal, ti traffic division ti siudad ti Laoag.
Basar iti inpakaammo ni Rosal, naalaan ti alcohol test ti drayber ti motorsiklo, no sadinno a naduktalan nga adda ti impluensiana iti nasanger.
Mainaig iti daytoy, napasamak ti panagdinnungpar iti paset ti Rizal Street iti Barangay 28 San Bernardo iti siudad ti Laoag.
Basar iti immunan nga impormasion nga imparuk-at dagiti otoridad, agturong nga agpadaya a direksion ti tricycle a manmanehoen ni Joshua Valdez Salapungol, agtawen 26, addaan lisensia ken residente ti barangay San Mateo ditoy siudad ti Laoag. Ken idinto a ti nakamotorsiklo a nakadinnungparna ket agturong nga agpalaud a direksion a minaneho ni Paolo Medina Tayag, agtawen 32 ken agnanaed iti barangay 27 Nuestra Seniora de Solidad iti siudad ti Laoag
Insigida a naitaray iti Karmelli Hospital ti maladaga ngem naiyakar daytoy iti Mariano Marcos Memorial Hospital and Medical Center iti sioudad ti Batac para iti naan-anay a pannakatamingna. Kabayatanna, kalpasan ti insidente ket inpakaammo ti maysa kadagiti kabagyan ti biktima a pimmusay ti maladaga kabayatan ti pannaka-tamingna.
