LAOAG CITY – Manarimaan ti pannaka-imbestigar ti insidente ti vehicular traffic incident a pakairamanan ti Mitsubishi L300 van ken Honda Beat a motorsiklo iti paset ti Josefa Llanes Escoda Highway iti Brgy 18 San Isidro iti ili ti Sarrat.
Dayta ti inabatad ni PCPT. Ashley Clyner B. Cacayorin, Hepe ti Sarrat Municipal Police Station.
Basar iti inisial nga imbestigasion, kabayatan ti panagmaneho ti driver ti L300 van, maipagarup a saanna a nakontrol ti manibela nga isut gapuna a naidungparna ti luganna iti likudan ti Honda Beat.
Mainaig iti daytoy, naamoan nga awan ti suot a helmet dagiti nakalugan ti motorsiklo, kabayatan nga iti agdama, maiyururay pay laeng ti rersulta ti alcohol test ti nagmaneho iti nasao a van.
Maipalagip a napasamak ti maysa a vehicular traffic incident iti paset ti Josefa Llanes Escoda Highway iti barangay 18 San Isidro iti ili ti Sarrat.
Ti nasao nga insidente ket nakairamanan ti maysa a Mitsubishi L300 a minaneho ti maysa a lalaki, naasawaan, agtawen 47, maysa nga embalsamador ken residente ti barangay 1 Veleancio iti ili ti Banna. Ken idinto a ti nagmaneho iti Honda Beat ket maysa a lalaki, agtawen 18, awanan asawa, maysa a construction worker ken residente iti Barangay 18 San Isidro iti ili ti Sarrat ken kan kasta met iti kalubbonna a babai.
Mainaig iti insidente, nagsagaba ti sugat iti nagduduma a paset iti bagi ti drayber ti motorsiklo ken ti kalubbonna. Gapu iti daytoy, insigida a naitaray ti drayber ti motorsiklo iti Dingras District Hospital kabayatan a naipan met iti Governor Roque B. Ablan Sr. Memorial Hospital (GRBAMH) ti kalubbonna.
