LAOAG CITY – Umaboten iti sumurok 52,700 Certificates of Registration (COR) nga adda karamanna a Registration Seal Badge ti naipaiman ti Bureau of Internal Revenue (BIR) kadagiti online seller, service provider ken content creator agingga idi Oktubre 14, 2026.
Inyuswat ti Registration Seal Badge iti babaen ti Revenue Memorandum Circular wenno RMC No. 38-2026 tapno maprotehiran ti pribado nga impormasion ken privacy dagiti nakarehistro a negosio ken propesional iti digital platforms.
Sinukatanna daytoy ti dati a pagalagadan idi 2025 nga agbilbilin nga i-display iti publiko ti pakabuklan a kopia ti Certificate of Registration (COR) wenno electronic Certificate of Registration (eCOR) kadagiti website ken social media page.
Inpaganetget ni Bureau of Internal Revenue Commissioner Charlito Martin R. Mendozaa a gagem ti badge nga aramiden nga ad-adda a natalged ken naurnos dagiti online transaction kabayatan nga ar-aramiden a naal-alisto ti panangsurot iti linteg ti buwis.
Daytoy a proyekto ket paset ti BIR DARES reform agenda para iti Digital and Data Transformation, a pakairamanan pay ti electronic registration, digital TIN identification, Taxpayer Portal ken ti phased implementation ti electronic invoicing.
Kabayatanna, iti mamaen ti RMC No. 99-2026, pinabayag ti ahensia ti deadline iti panangikabil ti badge kadagiti digital page agingga Oktubre 31, 2026.
Ginutigot pay ti Bureau of Internal Revenue dagiti covered taxpayer nga insigida nga ag-secure ken ag-post ti badge, kabayatan a mabalin pay daytoy nga i-scan dagiti consumer tapno maberipikar no lehitimo ti online business sakbay a makitransaksion.
