Inpakaammo ni Ms. Cathy Estavillo, Amihan Secretary-General ken Bantay Bigas spokesperson nga agtultuloy ti panangiyuswat da ti tignay-protesta iti Metro Manila kadwa da ti nagduduma a grupo dagiti mannalon.
Segun ken n Estavillo, immuna a nagpwesto da iti sango ti Department of Environment and Natural Resources ngem pinapanaw da dagitoy.
Gapu iti daytoy, kuna na nga immakar da iti sango ti Department of Agrarian Reform ngem pinapanaw da manen dagitoy.
Nupay kasta, inpetteng ni Estavillo a saan da a sumuko a mangilaban iti pakaseknan dagiti mannalon agsipud ta saanda pay a nakabangon manipod iti nagbalin nga epekto ti habagat no sadinno nga umabot iti P4.3-bilyon a pisos ti balor dagiti nadadael a produkto.
Innayon na nga iti agdama ket agproblema manen dagiti mannalon gapu iti possible nga itunda ti nakaro nga adda El Niño ditoy pagilian.
Inpaganetget ni Estavillo a no saan a masolusyunan ti gobierno ti parikot dagiti mannalon ket dakkel ti posibilidad na a ngumato amin a presyo dagiti magatgatang aglalo dagiti taraon.
Kuna pay ni Estavillo a no adda man dagiti mannalon a makapagmula ket sigurado a bassit metlaeng ti maapit da.
