LAOAG CITY – Agtultuloy a maag-agasan iti Mariano Marcos Memorial Hospital and Medical Center iti ciudad ti driver ti motorsiklo iti napasamak a disgrasya iti Badio-Tartarabang Road, iti bisinidad ti Sitio Riverside, Barangay Badio, iti ili ti Pinili.
Basar iti report, kabayatan ti panagdaldalyasat ti maysa a Yamaha Aerox nga inturong ti agtawen ti 21, lalaki, awanan ti asawa, mannalon ken residente iti Barangay Badio iti ili ti Pinili ket naripar na ti hose a naipaintar iti kalsada isut gapuna a nagpainayad.
Nupay kasta, ditoy met a maipagarop a saan a nakita a dagus ti sumarsaruno nga Honda Wave 125 nga inturong ti agtawen ti 25, awanan ti asawa, helper, ken residente ti Barangay Capangdanan, iti ili ti Pinili, a nangitunda ti panagdinnungpar da.
Kas resulta iti napasamak, saan a nadangran ti nangiturong ti Yamaha Aerox idinto ti driver ti Honda Wave 125 ket nagsagaba ti nakana a sugat iti ulo ken awan ti poot na idi naitaray iti Karmelli Clinic and Hospital iti ili ti Pinili, ngem naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na.
