Naglikudan ti Northwestern University (NU) ti naidanun a reklamo ditoy Bombo Radyo Laoag mainaig iti nainayon a P5,500 iti bayadan dagiti fourth-year Nursing students para iti subject a Competency Appraisal ken bayad para iti finals.

Segun iti naipatulod a mensahe ti maysa nga indibidwal, pito a sections dagiti fourth-year students ti naapektaran iti daytoy.

Kunana a namnamaen dagiti estudyante a bassit laeng ti bayadan da para iti finals, ngem nasdaaw da idi nakita da iti portal accounts da ti nainayon a P5,500 a mabayadan.

Saan met a nalawag kadagiti estudyante no ania ti nainayon a bayadan da ken no apay a nairaman daytoy iti account da.

Inbatad ni Prof. Karl Lenin Benigno, Vice President for Administration ti Northwestern University, a maysa laeng daytoy a “misunderstanding” wenno saan a panagkikinnaawatan.

Segun kenkuana, tunggal adda dagiti additional fees ket umuna a maidalan iti meeting tapno maipakaammo ken mailawlawag kadagiti estudyante.

Innayonan na nga adda pagannurutan ti Commission on Higher Education (CHED) partikular ti Memorandum Order No. 03, Series of 2012, a masapul nga adda ti konsultasyon ken umiso a pannakaipakaammo sakbay ti panangipatungpal ti aniaman nga additional fees.

Kabayatanna, basar met iti Finance Office, awan ti P5,500 a nairaman iti bayadan dagiti fourth-year students.

Inlawlawag da a saan nga (100%) nga agpapada dagiti mabayadan dagiti students isut gapuna a binalakadan da dagiti estudyante nga agturong da iti finance office tapno makita ti breakdown ken mailawlawag dagiti bayadan da.

Kabayatanna, inbatad met ti dean ti Department of Nursing a ni Mr. Harvey Ganal a nailawlawag a naimbag kadagiti 4th year student ken uray dagiti nagannak da ti bayadan da para iti Competency Appraisal nga agdagop ti
4,750 pesos saan a 5,500.