LAOAG CITY – Inbatad ni ABC President Elmer Verdadero iti ili ti Dingras a nalawa ken naiget ti maiyus-uswat a contact tracing iti lugar da gapo iti kellaat a panagado ti kaso ti covid-19 no sadinno nga iti uneg ti maysa nga aldaw ket 27 ti naimaldit a baro a nagpositibo.
Segun kenni Verdadero, agamak da amangan no agwaras ti virus iti nasao nga ili gapo ta kaadoan kadagiti baro nagpositibo ket STL collector.
Nupay kasta, mangnamnama ni Verdadero nga awanen ti mainayon iti kaso ti ili da gapo ta ti kabuteng da ket no agpositibo dagiti agpatpataya ti STL ket mairamraman dagiti ado a tattao.
Kinumpirmaran na a ti puon ti panagado ti kaso ti covid-19 iti ili da ket iti kabo a nagatendar iti pannakabola ti STL manipud iti Barangay Barong ken daytoy ti nakaakar kadagiti baro a nagpositibo iti nasao a sakit.
Agpapan maisursurat ti damag ket manarimaan ti panagtataripnong na kadua da ni Mayor Joeffrey Saguid tapno pagsasaritaan ti sitwasyon iti ili da.
Kabayatanna, inbatad ni Police Captain Joseph Calderon, ti chief of police ti PNP-Dingras a dagus da a naginspeksyon kadagiti nalockdown a sitio ken barangay iti nasao nga ili.
Dinakamat na a nabarikadaan metten dagiti nalockdown ken adda dagiti nakabantay.
Pinalagipan met ni Calderon dagiti taga Dingras nga agtalinaed iti pagtaengan, agisuot ti facemask ken agtitinnulong tapno malabanan ti covid-19.
