LAOAG CITY – Inbatad ni ABC President Reynaldo Mariano iti ili ti Solsona a nasakit ti nakem na gapu ta maipagarop a pinagsasawan isuna ni Mayor Joseph de Lara iti sangwanan dagiti nakaad-ado a tattao, pakairamanan dagiti amin a department heads iti LGU, pada na nga opisyal ti barangay ken dadduma pay.
Daytoy ket gapu ta maipagarop a saan a nagprotocol iti mayor mainaig iti panagibunong ti food packs manipod iti kapitolyo probinsyal iti nagduduma a barangay iti nasao nga ili.
Segun ken ni Mariano, timmawag kenkuana ti kapitolyo probinsyal
Tapno ken inpakaammo da nga adda ti mapan da ipan a food packs iti nasao nga ili para iti nagduduma a barangay.
Naibilin pay ken ni Mariano a masapol a tunggal kapitan ket mangala ti dua a kadwa na.
Inpakaammo na nga adda amin ti radio da a kakapitan, opisyal ti munisipyo, department heads, PNP, BFP ken Munipal Health Office (MHO).
Gapu iti daytoy, in-radio na ti pammilin kenkuana ti kapitolyo probinsyal tapno maamoan da amin ken makapagsagana da.
Kuna na nga immuna a simmangpet dagiti agpapaay iti kapitolyo probinsya a pakairamanan ni Provincial Agriculture Norma Lagmay iti barangay hall iti barangay na.
Innayon na nga iti panangur-uray da kadagiti relief packs ket binaon ni Lagmay a mapan na ayaban ni mayor de Lara tapno agpipicture dan.
Dagus a napan ni Mariano iti lugan ti mayor ket kinatok na daytoy, ngem maipagarop a ditoy metten a pinagsasawan na gapu ta saan a nagprotocol.
Inpetteng ti ABC President a napalalo ti bain na ken ti kadagsen unay ti rikna na ket ti maipagarop nga inbaga ti mayor nga agpulpulitika daytoy idinto nga ar-aramiden na laeng ti naibilin kenkuana manipod iti kapitolyo probinsyal.
Gapu iti panagsasao kenkuana ti mayor ket nabuwak dagiti tattao iti lugar ken nagtatalaw dagiti dadduma a kakapitan iti nasao nga ili.
Innayon na nga iti baet a pinagsasawan daytoy ti mayor ket saanna pulos a sinungbatan, imbes ket nagpadespensar pay daytoy.
Kabayatanna, inadmitir ni Mayor Joseph de Lara iti ili ti Solsona a nakapungtot iti inaramid ni ABC President Reynaldo Mariano.
Daytoy ket mainaig iti maipagarop a saan a panangipakaammo kenkuana ti ABC President ti panagturong dagiti agpapaay ti kapitolyo probinsyal iti ili da tapno mapan da agibunong ti relief packs iti nagduduma a barangay iti nasao nga ili.
Inbatad na nga iti adda dagiti taga-probinsial kapitol ket napan met ngem saan a bimmaba iti lugan na gapu ta iyur-uray na a mapan ibaga ti ABC President.
Nupay kasta, idi maamoan ni Provincial Agriculturist Norma Lagmay nga adda isuna iti lugar ket napan immasideg tapno ayaban na daytoy a mapan da agpicture, ngem insungbat na nga apay mapan makipicture idinto a saan nga ibagbaga ti ABC president ti mapaspasamak iti ili da.
Gapu iti daytoy, pimmanaw ni Lagmay ket napan ken ni ABC president Mariano ken possible a binaon na a mapan na ayaban ti mayor.
Kuna ti mayor a madlaw na nga adda ti panagkedked ti ABC president ngem napilitan met laeng a napan immasideg iti ayan na.
Innayon na a saan a dagus a nagsao ni Mariano ngem gapu ta saan a pumanaw ket inlukat na ti tawa ti lugan ken sinaludsud na no apay napan, ket ditoy nga inayaban ti ABC Pres tapno agpipicture da.
Saan metten a nalapdan ti mayor ti nagsarita ket kinunana ken ni Mariano nga awan ti nakem na ta saanna pay nga ammo ti agprotocol.
Segun pay ken ni Mayor de Lara, kanayun a kastoy ti ar-aramiden ti ABC Presidente isut gapuna na a kuna na a no adda ti respeto ni Mariano kenkuana ket masapol a mapanna koma ipakaammo dagiti mapaspasamak iti ili da.
