LAOAG CITY – Inlawlawag ni ABC President Mikee Fariñas ditoy ciudad ti Laoag no apay a saan da a napan nagatendar iti Liga Congress a naisayangkat idiay ciudad ti Baguio.
Segun ken ni Fariñas, awan ti naawat da nga imbitasyon isut gapuna a saan da a napan kadagiti kakadwa na a kapitan ditoy ciudad.
Inbatad na nga awan ti rason a saan da a mapan agatendar no adda ti naited kadakuada nga imbitasyon.
Daytoy ket gapu ta ditoy a mapagsasaritaan dagiti plano, programa kadagiti barbarangay ken dadduma pay a pagsayaatan ti masakupan da a lugar.
Saan a sigurado ni Fariñas no isuda laeng a kakapitan ditoy ciudad ti Laoag ti saan a napan nagatendar ti Liga Congress, ngem mamati a saan a nairanta ti saan a pannakaipaay kadakuada ti imbitasyon.
