LAOAG CITY – Natiliw ti maysa nga abogado babaen ti naisayangkat a drug buy bust operation idiay Barangay 10 ditoy ciudad ti Laoag.
Nabigbig daytoy a ni Atty. Michael Llaguno, agtawen ti 43 ken residente idiay Barangay 1 Ricarte iti ciudad ti Batac.
Nakumpiskar kenni Llaguno ti tallo a sachet a naglaon ti maipagarop a shabu, sangaribo a pisos a buy bust money, maysa a tooter, lighter, kaha ti sigarilyo, wallet ken 200 a pisos.
Segun kenni Police Chief Master Sergeant Harold Nicolas iti Provincial Drug Enforcement Unit (PDEU), adda ni Llaguno iti Director for Intelligence (DI) watchlist iti National office ti Philippine National Police (PNP) idi 2017 ngem addan iti listaan ti PNP-Laoag idi 2016.
Inbatad na a nabayagen a mamonmonitor ni Llaguno ken agop-operar ditoy ciudad ti Laoag ken Batac, ili ti San Nicolas, ken ili ti Paoay.
Inlawlawag na nga iti Barangay 5 ditoy ciudad ti lugar ti transaksyon ngem gapo iti kinaalisto ni Llaguno a pimmanaw ken saan a dagus a nakaresponde dagiti back up team ket kinamat da agingga iti Barangay 10 a nakatiliwan na.
Kunana a masdaaw gapo ta mabalin a mangmandar ngem mimso pay a ti abogado ti direkta a maki-transaksyon.
Kabayatanna, naiget a naglikudan ni Llaguno nga adda ti napasamak a transaksyon a nakatiliwan na babaen ti drug buy bust operation.
Segun kenni Llaguno, linukatan dagiti kameng ti PNP ti lugan na ken maipagarop nga inulod da isuna a rumwar.
Inpetteng na pay a nalawag a planted wenno naimula dagiti ebidensya a naala kenkuana ken awan ti ammo na nga adda daytoy iti national list ti PNP.
Ibilang na pay a nakakatkatawa ti napasamak gapo ta kunana nga awan ti naiysuwat nga operasyon ken awan ti naala manipud iti ikot na.
Inbatad na nga adda iti Barangay 5 ditoy ciudad gapo ta napan nagideposito ti kwarta na iti maysa a bangko ken saan a kinamat dagiti pulis.
Innayon nga awan ti pakainaigan na iti iligal a droga no diket ado laeng ti kliyente na mainaig iti daytoy a banag.
