LAOAG CITY – Kumpiyansa ni Atty. Nicholas Kaufman, ti kangrunaan nga abogado ni dati a Presidente Rodrigo Duterte, nga adda ti napigsa nga argumento da tapno maisardeng ti kaso kontra ken ni Duterte iti International Criminal Court (ICC) sakbay pay a madanun ti pannakausigna intono Setyembre 23 ita a tawen.
Inpetteng ni Kaufman a saan a sakop ti hurisdiksiyon ti International Criminal Court ti kaso gapu iti panagikay ti Pilipinas iti international court sakbay pay nga in-authorize ti imbestigasyon kontra iti dati a presidente.
Innayon ni Kaufman a ti panag-withdraw ti Pilipinas manipod iti International Criminal Court ket nagbalin nga epektibo sakbay pay a nangrugi ti imbestigasyon da.
Mangnamnama pay daytoy nga agballigi ti depensa da no maawat ti korte ti argumento da a manglukat ti posibilidad a saan a matuloy ti confirmation-of-charges hearing.
Kabayatanna, inlawlawag pay ni Atty. Kaufman a ti panangarestar ken ni Duterte ken ti alisto a panangipasa iti International Criminal Court ket maysa a “kidnapping” ken “extrajudicial rendition,” a mailabsing iti linteg ti Pilipinas.
Nupay kasta, immunan nga inrakurak ti gobierno ti Pilipinas a ti panangisuko ken ni Duterte iti International Criminal Court ket paset laeng ti obligasyon da iti International Criminal Police Organization.
