LAOAG CITY – Nabara ti sungbat iti nagbaetan da United States President Joe Biden ken dati a Pres. Donald Trump maipapan iti isyu ti aborsion wenno panangparegreg kadagiti maladaga.
Ti aborsion ti maysa kadagiti sentro ti debate no sadinno napagsaludsodan dagiti dua no ania ti takderda iti pannakausar ti aborsion idiay Estados Unidos.
Segun ken ni Biden, nakasaganan a mangisubli iti Roe vs Wade, maysa a landmark decision iti Estados Unidos idi 1973 a mangsalaknib iti kalintegan dagiti umili a mangpili iti aborsion.
Mainaig iti daytoy, nai-overturn ti nadakamat a desision idi 2022 no sadinno tallo kadagiti hues ti nagbutos a pabor iti daytoy nga immuna a dinutokan ni Trump.
Kinondenar ni Biden ti ndakamat a desision iti napasamak a debate ken inpapilitna a kasapulan a maikkan dagiti umili, nangruna dagiti babbai, iti gundaway ken mangaramid iti bukodda a pangngeddeng maipapan iti daytoy.
Iti biang ni Trump, inpaganetgetna a suportaran ti kaaduan nga United States citizens iti nadakamat a desision. Kinunana a saan daytoy nga umanamong a maaddaan ti federal abortion ban, ngem palubosanna ti tunggal estado a mangmonitor iti kasasaad dagiti babbai.
Inpasingked met ti dati a Presidente ti Estados Unidos a dagiti laeng mailaksid iti aborsion ket kadagiti kaso ti panangrames, incest, ken no kasapulan a maisalakan ti biag ti ina.
Iti agdama, nagduduma ti lokal a linteg dagiti estado iti Estados Unidos maipapan iti aborsion.
