LAOAG CITY – Natiliw ti maysa a registered nurse nga abortionista babaen iti inyuswat nga entrapment operation ti PNP Laoag iti maysa nga hotel iti Brgy. 23 ditoy siudad.
Segun ken ni PCapt. Christian Felix, ti Operations Traffic Officer ditoy siudad ti Laoag, namunganay ti pannakaisyangkat ti operasyon kalpasan ti agtultuloy a pannakaawat da ti impormasyon mainaig iti aktibidad ti abortionista nga agtawen ti 52, residente iti Brgy. 16-Quiling Sur iti siudad ti Batac ken agpapaay kas nurse iti pribado a klinika iti nasao a siudad.
Kuna na a nagballigi ti operasyon kalpasan a nagpammarang nga agpaikkat ti sikog ti asset da iti nagdanunan da a maysa nga hotel iti Brgy. 23.
Inbatad na a nakumpiskar manipod iti abortionista ti maysa a set ti dextrose, siyam a pidaso ti cytotec tablets, uppat a pidaso ti oxytoxin ampule, dua a pidaso ti Tourniquet a nagmaris ti blue ken green, maysa a white plaster, maysa a paris ti gloves, dua a cellphon, PRC-ID, ti nausar iti transaksyun a 10,000 a ribo a pisos ken dadduma pay a ramit a maar-aramat iti abortion.
Mainaig iti daytoy, inpakaamo ni Felix nga addan ti immuna a kaso ti subject ti operasyon idi 2016 mainaig iti abortion ngem nadismiss.
Innayun na a kaso a panaglabsing iti Article 256 ken Article 259 iti Revised Penal Code wenno Abortion practiced by a physician or midwife and dispensing of abortives ti maipila kontra iti abortionista.
