LAOAG CITY – Awan pay ti naestablisar ti nailian a pulisya a motibo ken pakabigbigan dagiti suspek iti pannakapaltu-paltog a poon ti nakatayan ni Barangay Chairwoman Helen Abrigado iti Barangay Ferdinand iti ili ti Marcos.
Daytoy ti inbatad ni Police Major Jhonevale Maramag, ti chief of police iti ili ti Marcos kalpasan ti panagtataripnong da iti Ilocos Norte Police Provincial Office (INPPO) nga idadaulwan ni Provincial Director Police Col Julius Suriben.
Kuna ni Maramag a napagsasaritaan da pay iti naiyuswat a taripnong ti sumaruno nga addang da mainaig iti Abrigado slay case.
Inpanamnama pay ti opisyal nga agtultuloy iti panagimbestigar da ken mangnamnama a masolbar ti kaso iti kabiitan a panawen.
Immunan nga inpakaammo ni Maramag a kalpasan ti lantern parade ket agawid koman ti grupo ti biktima a nakalugan iti Mitsubishi L300 FB a kukua ti Barangay Ferdinand ken inturong ni Brgy. Kagawad Carlo Bagaoisan, ngem idi adda da iti karayan iti paset ti Brgy. Tabucbuc ken ditoyen a napaltu-paltugan ni Abrigado babaen kadagiti dua a lallaki a naglubbon iti motorsiklo.
Naitaray ti biktima iti Doña Josefa District Hospital babaen kenni Kag. Bagaoisan ngem naiyakar daytoy iti Mariano Marcos Memorial Hospital and Medical Center iti ciudad ti Batac nga isu metten ti nakatayan na gapu kadagiti sinagaba na a nakana a sugat.
