LAOAG CITY – Nakagun-od ti baro a world record ti maysa nga abugada idiay Texas, U.S.A. gapu iti naidumduma a kaakaba ti dila daytoy.
Kinumpirmaran ti records keeping organization a Guinness World Records a ni Brittany Lacayo ti baro a world record holder ti titulo a “Widest Tongue (female)”.
Adda ti kaakabana a 3.11 inches ti dilana isu a naabakna ti previous record a 2.89 inches laeng.
Inbatad ni Lacayo, ubing pay laeng ket ammonan a saan nga ordinario ti kaakaba ti dilana ngem saanna nga ammo nga isuna ti maysa kadagiti addaan ti naakaba a dila iti intero a lubong.
Napanunutanna laeng nga agisubmitir ti aplikasion iti Guinness idi nakitana ti litrato ti previous record holder ken napanunutna a kabaelanna daytoy nga atiwen.
Iti agdama, magagaran nga ipakaammona ti barona nga achievement kadagiti padana nga attorney iti pagtartrabahoanna a law firm.
