LAOAG CITY – Naiget a naglikudan ti abugado ni dati a Congressman Zaldy Co ti alegasion a maipagarup a mangipatpatulod ti klientena kadagiti “feelers” iti gobierno iti babaen kadagiti sumagmamano a padi.
Inbatad ni Atty. Ruy Rondain a maipagarup nga awan ti aniaman nga addang ti kampoda tapno makikoordinar iti gobierno ken awan ti padi a naipatulod para iti aniaman a klase ti pannakisarsarita.
Inpettengna nga isuna laeng ti otorisado nga agsarita para iti nagikkat a kongresista.
Inlawlawagna a malaksid laeng no direkta a nakasarita dagiti nadakamat a padi ni Co ket ibilangna a saan nga otorisado dagiti maibagbaga a “feelers.”
Maipalagip nga inrakurak ni Department of the Interior and Local Government Secretary Jonvic Remulla a maipagarup a nangipatulod ti “feelers” ni Co iti Office of the Ombudsman tapno makisarita mainaig iti maiwaywayat nga imbestigasion.
Immuna iti daytoy, sumangsango ni Co kadagiti kaso a malversation ken graft mainaig iti maipagarup a ₱289 milyon a maanomalya a flood control project idiay Naujan, Oriental Mindoro.
