LAOAG CITY – Nawayawayaanen iti pannakaibalud iti Senado ti maipagarup nga Accountant ni suspended Bamban Mayor Alice Guo a ni Nancy Gamo.
Ni Sen. Robin Padilla ti nangaramid ti mosyon a wayawayaan ni Nancy Gamo iti kustodiar ti Senado iti panagdengngeg ti Committee on Women, Children, Family Relations and Gender Equality.
Nagyaman met ni Panel Head Sen. Risa Hontiveros ken ni Gamo iti pannakitinnulongna ken dinakamatna a nawaya daytoyen iti hurisdiksion ti komite sakbay a masuspinde ti panagsaludsod.
Maipalagip a ni Gamo ket inarestar ti Sergeant-at-Arms ti Senado iti katengngaaan ti Hulio kalpasan a naiparuk-at ti warrant of arrest kontra kenkuana.
Iti panagdengngeg ti Kamara idi Lunes, inadmitir ni Gamo a Freelance Accountant isuna ken tultulunganna ni Guo iti panangala ti incorporation paprers para kenkuana ken dagiti kompania ti pamiliana idi 2012 ken adda pay dagiti dadduma a corporations pakairamanan ti dua a Philippine Offshore Gaming Operators companies.
