LAOAG CITY – Inlawlawag ni ACT Partylist Representative France Castro, kameng ti Makabayan Coalition, ti kalikagum ti Makabayan Coalition a mangipila ti disqualification cases kontra kadagiti nagkandidatura nga adda ti pakanaiganna iti political dynasty.
Segun kenkuana, basar iti datos idi 2016, 80% kadagiti kongresista ti naggapu iti political family idinto a 70% met iti adda iti lokal a gobierno ken nabbaba pay a puesto iti politika no sadinno iti agdama ket adda ti 25% iti senado ket adda ti pakanaiganna iti political dynasty.
Inlawlawag ni Castro nga arigna awan ti espasio dagiti ordinario nga umili nga addaan iti kabaelan nga agserbi iti publiko.
Kinunana a maysa kadagiti makitada nga agbalin a karit iti daytoy a kalikagum ti Makabayan coalition ket ti kanikurang ti diskusion maipapan iti daytoy iti kongreso.
Gapu iti daytoy, planoda nga iyasideg ti isyu iti Korte Suprema no bilang man saan daytoy a mapagsasaritaan iti Commission on Elections.
Innayon ni Castro a napateg nga ipakaammo kadagiti umili ti epekto ti political dynasty ken maammoan dagiti implikasion ken agbalin a resulta iti pagilian.
Patienna na dagiti agbalin a potential na daytoy a kalikagumda iti masungad nga eleksion ket mangipaay ti gundaway kadagiti kualipikado a kandidato tapno agserbi iti publiko ken tumulong a mangbangon iti ad-adda a balanse a gobierno.
