LAOAG CITY – Saan nga irekomendar ti Alliance of Concerned Teachers (ACT) Teachers Partylist ti panagresign ni Department of Tourism Secretary Christina Frasco gapu iti kontrobersyal nga tourism slogan a “Love the Philippines”.
Daytoy ti inbatad ni Alliance of Concerned Teachers (ACT) Teachers Partylist Representative France Castro.
Inlawlawag ni Castro nga adda ken ni Frasco no aglusulos iti pwesto ngem para kadakuada kalikagom da ti agimbestigar nga umuna.
Inpalgak na a mangipila da ti house resolution para iti panagimbestigar da iti kontrobersyal a tourism slogan iti Pilipinas ken ikkan da ti gundaway ni Frasco nga agpalawag.
Inpetteng pay ni Castro a no saan a makaaramid ti original nga slogan ti Department of Tourism ket nasaysayaat no agtalinaed ti dati nga slogan nga “It’s More Fun in the Philippines”.
Immunan nga inpalgak ni Castro a mabalin a ma-misinterpret pay ti kaadoan kangrunaan na dagiti adda iti sabali a pagilyan ti kayat a sawen ti “Love the Philippines” no sadinno nga iti tagalog ket “Mahal sa Pilipinas”.
Innayon na a possible a ti pannakaawat ti kaadoan ket nangina ti plete iti Pilipinas, nangina dagiti magatgatang ken nangina amin.
Kabayatanna, inpetteng ni Castro a saan laeng a dagiti sumagmamano a video manipod iti promotional video ti Department of Tourism ti maipagarop a nakopya no di ket uray ti mismo a “Love the Philippines” gapu ta basar iti panagsukisok da ket immunan nga inusar daytoy ti Cyprus no sadinno a ti slogan ti nadakamat a pagilyan ket “Love the Cyprus”.
