LAOAG CITY – Inbatad ni dati a Mayor Eddie Guillen iti ili ti Piddig a sakbay a naiwaragawag ti pannakadutuk na kas acting administrator iti National Irrigation Administration (NIA) ket addan ti immuna a panagsarita da ken ni Presidente Ferdinand “Bongbong” Marcos Jr.
Inkari ni Guillen a saanna a paayen ti presidente gapu ta aramiden na amin a kabaelan na tapno matungpal dagiti arapaap ti ama ti pagilyan para iti Pilipinas.
Inlawlawag na a napintas dagiti plano ni Presidente Marcos para iti Pilipinas kangrunaan na iti biang ti agrikultura.
Kuna pay ni Guillen a nakita ti presidente nga adda man dagiti maipapaay a tulong kadagiti mannalon ngem saan a maitiempo gapu ta saan nga aggigiddan ti pannakasapul da kadagitoy.
Innayon na a kalikagom ti presidente a no ania ti kasapulan dagiti mannalon ket isu ti dagus a maited kadakuada tapno sigurado a mausar ken makatulong dagitoy.
Inpanakkel pay ti dati a mayor a naaramid na ti nangpadur-as iti ili ti Piddig no maipapan iti agrikultura isut gapuna a dagitoy ti ipakat na para iti intero a pagilyan.
