LAOAG CITY – Inbilin ni Philippine National Police (PNP) acting chief Police Lieutenant General Jose Melencio Nartatez Jr. iti Criminal Investigation and Detection Group (CIDG) ken dagiti local police units nga agsagana iti possible a pannakaiparuk-at ti warrant of arrest kontra kadagiti akusado iti kaso dagiti mapukpukaw a mammallot.
Inbatad ni Nartatez nga apaman nga adda ti maiparuk-at a warrant of arrest ket insigida a makikoordinar ti Philippine National Police kadagiti maseknan a police units ken ti korte tapno masigurado ti usto ken nainkalintegan nga implementasyon daytoy.
Immunan nga inrakurak ti Department of Justice a ti murder complaint a naipila kontra iti businessman a ni Charlie “Atong” Ang ken dadduma pay nga indibidual mainaig kadagiti mapukpukaw a mammallot ket submitted for resolution.
Daytoy ket kalpasan a ti complainant ket saanen nga agpila ti komento na iti counter-affidavits dagiti respondents.
Karaman kadagiti naipila a kaso ket ti kidnapping with serious illegal detention, multiple murder, ken dadduma pay.
Adda ti pakabuklan a 57 a respondents ti nagpila ti counter-affidavits na pakairamanan ditoy ni Ang, actress Gretchen Barretto, ken ni dati a National Capital Region Police Office chief retired Police General Jonnel Estomo, nga agpapada a naglikudan da ti alegasyon.
