LAOAG CITY – Manamnama ti a-adu pay nga sports iti 2028 Olympics kagiddan ti plano a pannakaisubli kadagiti sumagmamano nga sporting events.
Basar iti inisyal a plano, agbalinen a 36 ti pakabuklan nga sport events iti Los Angeles Olympics maidasig iti 32 iti napalabas a Paris Games.
Karaman kadagiti mainayun ket ti ay-ayam a cricket a naudi a nabuya idi Paris Olympics 1900. Usaren daytoy ti fast-paced Twenty20 format ti nasao nga sports.
Agsubli met dagiti ay-ayam a baseball, softball ken ti lacrosse a sumagmamano nga edisyon metten a saan a nabuya iti Olympics.
Mabalin pay nga iserrek ti Los Angeles Organizing Committee ken dadduma pay nga sports kas ti flag football ken squash ngem iti agdama ket maad-adal pay laeng daytoy.
Maikkat met ti breakdancing nga immuna a gundaway nga inserrek iti kalepleppas a Paris Games.
Kabayatanna, nagtalinaed pay ti provisional status ti boxing iti sumaruno nga Olympics kagiddan kadagiti panawagan a panagreporma iti panangimaton iti nasao nga sporting event.
Kabayatanna, posible nga iti maudi a paset ti 2025 mangiparuk-at ti desision ti International Olympic Committee (IOC) maipanggep iti daytoy.
