LAOAG CITY – Inlungalong ni Senate Minority Leader Alan Peter Cayetano ti panangbukel ti maysa nga ad hoc committee a tumulong iti panagsagsagana ti pagilian kontra kadagiti dadakkel a krisis.
Iti Senate Resolution No. 350, inlungalong ni Cayetano, kaduana da Senate President Tito Sotto III ken Majority Leader Migz Zubiri, ti panangbukel ti komite a maawagan a Proactive Response and Oversight for Timely and Effective Crisis Strategy (PROTECT).
Buklen ti komite dagiti chairperson kadagiti nagduduma a komite iti Senado pakairamanan ti agrikultura, negosio, enerhia ken dadduma pay a sektor a napateg iti panangsungbat iti krisis.
Naipaganetget iti resolusion a nasken a saan nga agtalinaed a passive wenno mangnamnama laeng ti Senado iti tignay ti ehekutibo tunggal adda ti krisis aglalo no apektado ti biag, pamastrek ken pagsayaatan dagiti Pilipino.
Gagem ti gakat a tulungan ti gobierno iti panangbukel ti nalawag ken komprehensibo a contingency plan iti babaen ti panangpaayab kadagiti panagdengngeg, panagkalap kadagiti input manipud kadagiti nagduduma a sektor ken panagbantay idinto nga agtalinaed iti executive branch ti panangipatungpal kadagiti plano.
Nadakamat iti resolusion ti kumarkaro a tension iti nagbaetan ti Estados Unidos, Israel ken Iran ken ti epekto daytoy iti pagilian.
