LAOAG CITY – Saan a maapektaran ti adbokasia ni ACT Partylist Representative France Castro kalpasan a nasentensiaan iti kaso a panaglabsing iti Republic Act 7610 wenno Anti Child Abuse Law kaduana ni dati a Bayan Muna Representative Satur Ocampo.
Daytoy ti inbatad ni dati a kongresista ken agdama ita a Bayan Muna Executive Vice President Atty. Carlos Isagani Zarate no sadino nga ad-adalenen dagiti abogadoda ti desision ti korte ken manamnama nga iyapelarda daytoy iti Court of Appeals.
Maipalagip a nakumbiktaran dagiti dua kalpasan a naduktalan a nakabasol da iti tallo a kaso pakairamanan ti kidnapping ken human trafficking.
Inpakaammona a saanda a ninamnama ti resulta ti naipila a kaso a mapapati a pinarparbo kalpasan ti humanitarian mission idi 2018 babaen ti nadakamat a grupo gapu iti mapapati a panangriribuk dagiti estudyante babaen ti militar babaen ti panangserrada ti pagadalan idiay Davao del Norte.
Kinunada a nabayagen nga itantandudoda ti tumulong, daytoy ti gapuna a patienda nga awan ti krimen nga inaramid da gapu ta kayatda laeng ti tumulong nangruna kadagiti biktima ti kinaranggas.
Kabayatanna, idi laeng kalman ket kinumbiktaran ti korte ti Tagum, Davao Del Norte da Castro ken Ocampo iti agingga innem a tawen a pannakaibalud, pakairamanan ti sangapulo ket maysa nga indibidual gapu iti panaglabsingda iti section 10 Anti Child Abuse Law idinto a nullify ti isu met laeng a kaso a naipila kontra iti uppat a pastor.
Imbilin pay ti korte nga agbayadda iti P10,000 kas civil indemnity ken P10,000 kas moral damages iti tunggal menor de edad nga addaan ti interes a 6% iti kada tawen manipud iti maudi a desision agingga a mabayadan.
