LAOAG CITY – Nalitupan aminen dagiti immunan a nabakantian a posisyon iti Governor Roque Ablan Senior Memorial Hospital (GRASMH) ditoy ciudad ti Laoag.
Daytoy ti inbatad ni Dr. Roger Braceros, Officer In Charge Chief of Hospital iti nasao nga ospital.
Nupay kasta, inlawlawagna a dagiti nabakantian manen babaen kadagiti nagretiro nga empleado ket saan pay a nalitupan.
Kuna ni Dr. Braceros a mai-published manen nga umuna iti uneg ti maysa a bulan sakbay nga aplikaran dagiti bakante a posisyon.
Inpakaammona nga adu pay laeng ti kurangda iti ospital kas ti Nurses, Respiratory Therapist ken dadduma pay kas inpadanon kadakuada dagiti pannakabagi ti Licensing Bureau ti Department of Health manipod iti Metro Manila a mabalin a ma-fill up-an a posision.
Immunan nga inbilin ni Governor Matthew Marcos-Manotoc ti pannakalitup a dagus dagiti bakante a posisyon tapno agtultuloy ti napintas a serbisyo dagiti nagduduma a departamento iti nasao nga ospital.
