LAOAG CITY – Manarimaan nga ad-adalen ti DSWD dagiti guidelines para ti pannakaipatungpal ti RA 11469 wenno Bayanihan to Recover As One Act kalpasan a pinirmaan ni Presidente Rodrigo Duterte itay kallabes.
Daytoy ti inpakaammo ni Usec. Rene Glen Paje, iti DSWD central office.
Kuna na a karaman dagiti nasursuroda iti pannakaipatungpal iti umuna ken maikadua a bansada ti Social Amelioration Program kalpasan nga adda dagiti nagbalin a problema.
Segun kenni Paje, maipada met laeng ti Bayanihan 1 iti Bayanihan 2 gapu ta maipaayan ti tulong dagiti nababbaba ti kalidad iti panagbiag na.
Inbatad na nga adda da laeng dagiti baro a lugar wenno pamilya nga umawat iti tulong.
Inpasingked ni Paje a makikoordinar da kadagiti nagduduma nga ahensya ti gobyerno tapno maipatungpal da a naimbag dagiti probisyion ti nasao a linteg.
Kabayatanna, naliday ni Paje iti pannakasuspenso dagiti 89 a barangay chairmen babaen ti office of the Ombudsman.
Saan na pay a masinunuo ti bilang dagiti maipaayan ti tulong ken no sadino a lugar dagiti mabenepisyaran gapu ta manarimaan ti pannakaadal dagiti guidelines.
