LAOAG CITY – Inlawlawag ni Mr. Vic Dabalos, ti Provincial Department of Environment and Natural Resources (PENRO) dagiti dokumento a masapol iti panagpukan ti kayo.
Kuna ni Dabalos a dua a klase ti kayo a maipalubos a mapukan.
Daytoy ket ti planted trees a kas iti mahogany idinto a ti maysa ket premium trees wenno dagiti in-inot a maibusbos a kayo a kas iti narra.
Inbatad ni Dabalos a ti masapol a dokumento nu planted trees ti mapukan ket clearance manipod iti barangay ken titulo ti daga a nakaimulaan ti kayo a mapukan idinto a nu premium trees ti mapukan ket masapol nga adda ti permit manipod iti DENR.
Kabayatanna, inbunannag ni Dabalos a masapol met nga adda ti permit ken registration ti chain saw a mausar iti panagputol ti kayo.
Inbatad na a siasinoman a saan a makaipakita kadagiti usto a dokumento mainaig iti panagpukan ti kayo ket matiliw.
Ti palawag ni Dabalos ket namunganay kalpasan nga awan dagiti dokumento a naipakita iti napaputol a kayo iti Brgy. Raraburan ditoy siudad.
