LAOAG CITY – Inbatad ni Mrs. Perlita Cabello, ti officer-in-charge iti City Social Welfare and Development Office ditoy siudad ti Laoag nga agarup lima nga ubbing ti naduktalan nga adda ti pakainaiganna iti kaso ti simulated birth record ditoy siudad.
Inlawlawag na a daytoy ket ti arig na panangtagikua dagiti sumagmamano nga indibidual iti maysa nga ubing nu pay saan nga isuda ti orihinal a nagannak.
Kuna na a dagiti sitwasyon a mabalin a makaitunda iti daytoy ket ti pannakaited ti ubing iti mismo a kabsat ti nangipasngay ken daytoy ti masurot a nagannak ti ubing, banag a maikanniwas iti linteg.
Nu pay kasta, inbatad ni Cabello nga iti agdama ket adda ti adapsyon nga ar-aramiden ti Committee on Laws ditoy siudad nu sadino a ti insidente ti simulated birth record ket maipaayan ti amnestiya.
Naamoan a masapol laeng nga agbayad ti 1,000 a pisos a socialize fee dagiti nagannak nga adda iti kapada a sitwasyon tapno matratar babaen iti CSWDO sakbay a maipatulod iti DWSW-Regional office ken kalpasan na ket maipasa iti DSWD Secretary para iti approval.
