LAOAG CITY – Adda dagiti reports iti Philippine National Police maipanggep kadagiti scam incident ditoy probinsia.
Segun ken ni P/Col. Joemar Labiano, Provincial Director ti Ilocos Norte Police Provincial Office, dagitoy a klase ti scam ket ayuda, phishing, online lending app ken love and romance scam.
Inbatadna nga adda pay dagiti agar-aramat kadagiti nagan dagiti opisial.
Gapu iti daytoy, agtultuloy ti panangisayangkatda kadagiti information drive tapno ad-adda pay a maimpormaran dagiti umili.
Kunana nga adda dagiti ar-aramidenda nga addang ken adda dagiti panagsagsaganada no inkaso man mabigbigda ti maysa kadagiti suspek iti scam incident.
Innayonna a ti maysa kadagiti suspek ket nabigbigda babaen ti bank account.
Kabayatanna, nagballaag ni Gov. Cecilia Araneta Marcos iti publiko a saan nga insigida a mamati kadagiti agdawdawat ti aniaman a banag wenno kuarta a saan met nga am-ammo dagitoy.
