LAOAG CITY – Inpakaammo ni Atty. Joel Gines, ti provincial election officer ditoy Ilocos Norte nga agtultuloy ti panagakseptar ti opisinada iti Statement of Contributions and Expenditures (SOCE) dagiti nagkandidato iti 2022 elections.
Segun ken ni Gines, manipod iti 33 a kandidato nga agipasa ti SOCE ket siyam pay laeng dagiti nakaisubmitir, dua nga aldaw sakbay ti Hunyo 8 a deadline.
Inbatad na nga iti nasao a bilang ket tallo dagiti naabak ken siyam dagiti nangabak.
Mainaig iti daytoy, inlawlawag ni Gines a kadagiti local candidates ket tallo a pisos mai-multiply iti total a bilang dagiti botante ditoy probinsya ti maximum contributions ken expenditures ti kandidato nga addaan ti partido idinto a ti independent ket lima a pisos.
Kabayatanna, immunan nga inpakaammo ni Gines a saanen a masapol nga agipasa ti SOCE dagiti kandidato a nag-withdraw ti kandidatura sakbay a nangrugi ti panagkampanya.
Innayun na a dagiti met kandidato a nag-withdraw kabayatan ti panagkampanya ket dagitoy ti masapol latta nga agisubmitir ti SOCE.
Mainaig iti daytoy, inbunannag ni Gines a dagiti saan a makaisubmitir ti SOCE na agingga iti Hunyo 8 ket maipasa iti law department ngem agdenpede nu awaten da daytoy wenno saan.
Inpakaammo ti provincial director a ti kangrunaan nga epekto ti saan a panagisubmitir ti SOCE iti naikeddeng nga aldaw ket saan a makapagtugaw dagiti nangabak idi eleksyon.
Innayun na kadagiti met saan a napagasatan ket mabalin a mapatawan ti perpetual disqualification nangruna nu dua a daras ti pannakapaay a nagisubmitir ti SOCE.
