LAOAG CITY – Inadmitir ni Lt. Col. Ronald Mateo, civil military relations officer iti 11th infantry division nga adda dagiti naaw-awat da a pangta ti panagbomba iti Brgy. Walled City, Jolo, Sulu iti napalpalabas a lawas.
Daytoy ti rason a naiget ti seguridad nga ipapaay dagiti tropa ti gobyerno iti gapu ti nasao nga impormasyon.
Kuna na a napasamak ti ummuna a panagbettak babaen iti maysa a motorsiklo a nakaptan ti bomba ken naiyabay iti military truck.
Simmaruno ti babai a suicide bomber ti nangpabettak iti bagbagina iti sango ti DBP Bank.
Inbatad ni Mateo a possble nga ad-adu kuma pay dagiti nasugatan wenno pimmusay iti panagbettak no saan a nalappedan ken nagsakripisyo dagiti tropa nga adda iti nasao a lugar.
Segun kenni Mateo, tinarget dagiti terorista nga Abu Sayyaf dagiti tropa agraman dagiti sibilyan nga adda iti lugar a nakapasamakan ti panagbettak.
Inadmitir na a saan a naripar nga insegida dagiti otoridad ti presensya dagiti bombers.
Mainaig iti daytoy, nakontrol da ti sitwasyon kalpasan ti panagbettak rason nga awan dagiti makastrek wenno makarwar iti nakapasamakan ti panagbomba.
Saan da pay a makaiparuk-at ti nagan dagiti pimmusay ken dagiti nasugatan agingga a saan a maipakaammo nga umuna kadagiti pamilya da ti insidente.
