LAOAG CITY – Inpakaammo ti maysa a Private Lawyer a ni Atty. Kidd Castro, Criminal Law Professor ti Northwestern University nga adda ti hurisdiksion ti International Criminal Court nga arestaren ni Sen. Bato Dela Rosa.
Segun kenkuana, nagbalin a miembro ti Pilipinas iti International Criminal Court manipud Nobiembre 1, 2011 agingga idi Marso 17, 2019.
Nupay kasta, inpettengna a nagtalinaed nga adda ti hurisdiksion ti International Criminal Court kalpasan a naaramid wenno napasamak ti maipagarup a krimen ditoy pagilian idi miembro pay laeng daytoy.
Inbatadna a ti boluntario a panagpakita iti korte ket maysa a wagas iti panangtulong ngem no aglemlemmeng iti korte ket ad-adda a marigatan a makakiddaw ti tulong kas ti Temporary Restraining Order a mangipasimudaag a manglikliklik iti proseso.
Maipalagip a saan a pinatgan ti Korte Suprema ti kiddaw ni Sen. Dela Rosa a Temporary Restraining Order.
Immuna iti daytoy, kinumpirmaran ti Department of Justice (DOJ) a nangisubmitiren ti ahensia ti request para iti Interpol Red Notice kas paset ti legal process mainaig iti panangarestar ken ni Sen. Dela Rosa a sumangsango iti kaso a Crimes Against Humanity iti International Criminal Court.
