LAOAG CITY – Inlawlawag ni Mr. Arnelito Coloma, Presidente ti Modernized Jeepney Association ti Laoag-Batac-Paoay a dagiti laeng healthcare frontliners ti Mariano Marcos Memorial Hospital and Medical Center iti ciudad ti Batac ti ilugan da.
Daytoy ket kalpasan a maipagarop nga adda ti saan da a panagkikinawatan kadagiti tricycle drivers iti sangwanan ti ospital.
Segun kenni Coloma, adda ti dati a service dagiti frontliners ngem gapo ta nalpasen ti kontrata ket ti Ilocos Norte Transport Copperative ti napili kangrunaan na kadagiti modernized jeepney a mangilugan kadagitoy.
Kunana a daytoy nga addang ket agrimento iti nagbaetan ti Ilocos Norte Transport Cooperative ken iti mismo nga ospital.
Inpetteng na a mismo a kiddaw dagiti frontliners iti Ilocos Transport Cooperative daytoy a banag ken nangrugi da itay bigat.
Dinakamat na a dua a modernize jeepney ti nadesignaran a mapan mangsukon ken mangitulod kadagiti healthcare wokers iti nasao nga ospital.
Inadmitir met ni Coloma nga iti pannakairugi daytoy ket awan ti naipan a placard wenno karatula a pagilasinan kuma a dagiti laeng healthcare workers ti ilugan da ngem inpasigurado na nga ikkan danto dagiti nasao a behikulo.
Innayon na a maawatan na ti marikrikna dagiti tricycle drivers gapo ta maysa met isuna idi kadagitoy.
Gapo iti daytoy, kuna ni Coloma a plano na ti makisarita kadagiti tricycle drivers tapno malawlawagan daytoy a banag.
Kabayatanna, nagpadespensar ni Coloma kadagiti tricycle drivers iti sangwanan ti ospital kageddan ti panangilawlawag na ti laeng mailugan ket dagiti medical frontliners ken iti laeng alas-sais agingga iti alas-siete ti bigat ken malem nga agilugan da.
