LAOAG CITY – Adda ti maiyannatop a pannusa kadagiti mang-discriminate kadagiti maibilang a frontliners kontra ti coronavirus disease 2019 wenno COVID-19.
Daytoy ti inbatad ni Atty. Domingo Cayosa, presidente ti Integrated Bar of the Philippines kalpasan nga adda dagiti frontliners a mailanglangi gapu ti panangtaming da kadagiti pasyente ti COVID-19.
Kuna na a maibilang nga iligal ti saan a pannakailugan dagiti frontliners ken maipagarup a pannakandigos wenno pannakaispray da ti disinfectant.
Inbatad ni Cayosa nga adda dagiti maidandanun kadakuada a reklamo dagiti agpapaay iti ospital gapu ta saan da a mapastrek kadagiti paggigiyanan da.
Daytoy ket gapu ti panagbuteng dagiti lumugar ken karruba ti paggigiyanan dagiti doktor ken nurse nga agpapaay iti ospital.
Malaksid kadagiti frontliners, makapasar pay ti diskriminasyon dagiti pasyente wenno dagiti addaan ti sakit gapu ta liklikan dagiti maseknan a tamingen.
Pinalagipan ni Cayosa ti publiko a nakasagana ti grupo da a mangisakit kadagiti frontliners a makapaspasar ti diskriminasyon kadagiti dadduma a tattao.
Innayon ni Cayosa nga awan pay ti napilaan ti reklamo mainaig ti diskriminasyon ngem iwaywayat da ti information dissemination campaign.
