LAOAG CITY – Saan a basta makaruwar dagiti residente iti Kalimantan Island idiay Indonesia tapno mapan gumatang kadagiti kasapulan da iti uneg ti balay kangrunaan na dagiti makan gapu iti covid-19 pandemic.
Daytoy ti report ni Bombo International Correspondent Karen Bangug-Heagy, taga Isabela ngem agdama a mangisursuro iti nasao nga isla.
Inbatad na nga adda ti oras a panagbiyahe dagiti pampubliko a lugan ken uray iti panaglukaw dagiti supermarkets ken dadduma pay a pasdek negosyo.
Malaksid iti daytoy, naiget pay a maipatpatungpal ti saan a pannakaipalubos a rumuar iti uneg ti balay dagiti awan suot na a face mask.
Uray dagiti pagadalan ket nagtalinaed a nakaserra isut gapu na nga isursuro da lattan dagiti adalan da babaen iti online.
Segun kenni Heagy, nangrugi ti klase idi Hulyo itay napan a tawen ken agngudo koma iti umay a bolan ti mayo, ngem idi pay laeng Marso 16 ket nagrikepen dagiti pagadalan gapu iti covid-19.
Inadmitir ni Heagy a marigatan da iti online teaching gapu ta saan da a nasaganaan daytoy ken uray dagiti ubbing ket saan da unay a masurutan gapu ta saan da nga ammo nga usaren ti laptop dagiti nagannak da.
Malaksid iti daytoy, saan a matutukan dagiti nagannak a surwan wenno bayabayen dagiti annak da gapu ta kaadoan kadakuada ket makumikum iti negosyo da.
Iti agdama kuna ni Heagy ket umabot pay laeng ti 22 dagiti nagpositibo ti kaso ti covid-19 iti isla nga ayan na ken maysa ti pimmusay gapu iti virus.
