LAOAG CITY – Umabot iti nasurok a 305 a milyon a pisos ti naaprobaran a pundo para iti Ilocos Norte manipud iti gobierno nasional.
Daytoy ti inbatad ni Mr. Hashler Garalde, ti Social and Environmental Safeguard Focal Person ti gobierno probinsial.
Inlawlawag na a nagkiddaw ni Gob. Matthew Marcos Manotoc ti pundo para iti pannakaipatungpal dagiti proyekto a makatulong iti panangmentener ti napintas nga apit iti benneg ti agrikultura ken iti pannakaiwanwan a naimbag iti aglawlaw.
Inpakaammo na nga iti panagturong ti grupo ni Sec. Robert Borje iti Climate Change Commission ditoy probinsia ket inlungalong ti gobernador a mapundoan iti babaen ti People’s Survival Fund wenno PSF ti “Ilocos Norte Climate Resilient Intervention towards Sustainable Agriculture and Natural Resource Management”.
Kuna ni Garalde a ti kangrunaan a gagem ti proyekto ket ti pannakaestablisar dagiti mabalin a pangalaan ti danum ken sistema ti irigasyon a mangpadur-as kadagiti produkto a pang-agrikultura ken umado dagiti mabalin a pamastrekan.
Makatulong pay ti nasao nga addang a mangpasubli iti kinabaknang ti daga babaen kadagiti nagduduma a ganuat iti panagtalon, mang-develop ken mangipatungpal kadagiti a ganuat iti agro-forestry ken “watershed management” tapno mapasayaat ti pamastrekan dagiti nakukurapay ken nakakapuy nga umili.
Malaksid iti daytoy, maestablisar pay iti “climate field school a mangipaay ti edukasyon ken panagsanay a mangpabileg kadagiti Local Government Units iti panangmonitor ken panangtingiting iti kasasaad ti panawen ken mangipatungpal iti maiyannatup a ganuat a masapul a maadaptar iti benneg ti agrikultura.
Inbunannagna a mai-download ti nasao a pundo para iti probinsia iti babaen ti Development Bank of the Philippines wenno DBP.
Segun kenkuana, karaman kadagiti manamnama a pakausaran ti pundo ket ti pannakaipasdek dagiti Small Water Impounding Project wenno SWIP, solar irrigation system, Small Farm Reservoir wenno SFR ken dadduma pay.
Kunana a ti nasao a programa ket maipatungpal iti uneg ti lima a tawen a manamnama nga ad-adda pay a mangpadur-as iti probinsia ket makatulong a mangpataud iti ado a pagtrabahoan para kadagiti umili.
