LAOAG CITY – Inpakaamo ni Brgy. Chairman Ben Galiza iti Brgy. 10 iti ili ti Bacarra ken ti presidente ti Meat Vendors Association nga agkurkurang ti suplay ti karne ti baboy iti nasao nga ili.
Segun ken ni Galiza, maib-ibusen ti magatang a baboy kadagiti hog raisers wenno agtartaraken ti baboy iti ilida.
Inbatad na a makadandanunen pay iti nagduduma nga ili ditoy probinsya pakairamanan ditoy siudad ti Laoag tapno laeng agsapol ti maparti a baboy.
Inlawlawagna a dakkel nga epekto iti panagkurkurang ti suplay ti karne ti baboy dagiti aglako ti baboy kadagiti biyahero agisipod ta nangatngato ti presyo a paggatang dagitoy nga umabot ti 180 iti kada kilo.
Gapu iti daytoy, inbunannag ni Galiza nga adda ti plano da ken ni Dr. Rufino Cravalho, ti Municial Veterinarian iti ili ti Bacarra nga agsurat iti biang ti Sangguniang Bayan iti nasao nga ili mainaig iti ad-adda a panaglako dagiti kailian na iti sabali nga ili wenno dagiti biyahero.
Nagpanawagan pay daytoy ken ni Governor Matthew Marcos Manatoc para iti naan-anay a pannakatratar ti agtultuloy a panagkurkurang ti suplay ti karne ti baboy.
