LAOAG CITY – Inbatad ni Engr. Ma. Teresa Bacnat, ti OIC iti Provincial Agriculture Office ditoy probinsya nga adda ti panagngato ti presyo dagiti agricultural products.
Kuna na a maysa a rason ti panagngato ti presyo ket ti nangina nga abono ken gasolina.
Segun ken ni Bacnat, maysa ti produkto a kamatis kadagiti ngimmina gapu ta bassit ti suplay ken agang-angkat laeng ti probinsya manipod iti sabali a lugar.
Inpakaammo na nga umaboten iti 70 a pisos iti kada kilo ti kamatis manipod iti dati a 35-40 a pisos.
Inbatad na a malaksid iti kamatis ket karaman a ngimmato ti presyo na ti sitaw, tarong ken dadduma pay a nateng.
Mainaig iti daytoy, kuna ni Bacnat nga adda ti wagas ti provincial agriculture office tapno matulungan dagiti mannalon kas iti panankaipaay ti agricultural inputs ken libre a maimula a bukel ti nateng agraman ti planting materials.
Ginugtigot na dagiti mannalon a nu adda ti kasapulan ket mangipatulod laeng ti surat iti opisina ni Governor Matthew Marcos Manotoc ken ti agriculture office ti mangipaay ti aksyon.
