LAOAG CITY – Inbatad ni Mr. Rafael Adora, ti pharmacist iti Provincial Department of Health ditoy Ilocos Norte nga apaman nga adda ti maduktalan nga aglaklako ti peke nga agas ket dagus a maiyuman iti Food and Drug Administration (FDA).
Segun ken ni Adora, ti FDA ti addaan ti bileg a mangala ti sample kadagiti maireport a maipagarup a peke nga agas ken maipadalan iti test tapno maamoan nu pudno a peke wenno saan.
Kuna na a nu mapaneknekan a peke ti agas a mailaklako iti parmasya ket sumango iti pannusa a pannakaibalod ken mamulta.
Mainaig iti daytoy, inpakaammo ni Adora a ti pagilasinan a peke ti agas ket nakuskusnaw ti kulay daytoy, alisto a maburak ken sabali ti pannakaiyimprenta dagiti letra.
Kabayatanna, kuna na nga iti agdama ket awan met pay ti naawat a report iti Provincial Department of Health seknan ti peke nga agas.
Naiget ti panagpalagip na a gumatang ti agas kadagiti lehitimo ken rehistrado a parmasya.
