LAOAG CITY – Adda ti umdas a pondo para iti pannakaipaay ti benepisyo kadagiti senior citizens ditoy ciudad ti Laoag.
Daytoy ti inpasingked ni Mrs. Ruby Bunalade, ti City Planning and Development Officer (CPDO) ditoy ciudad.
Inlawlawag ni Bunalade a dagiti agtawen ti 80 ket makaawat ti 2 ribo a pisos; dagiti agtawen ti 85 ket makaawat ti 3 ribo a pisos idinto a dagiti agtawen ti 90 agingga iti 94 ket makaawat met ti 5 ribo a pisos iti kada tawen.
Innayon na a dagiti agtawen ti 95 agingga iti 99 ket makaawat ti 10 ribo a pisos iti kada tawen.
Mainaig iti daytoy, inpakaammo ni Bunalade a dagiti centenarian wenno dagiti makadanun iti tawen a 100 ket makaawat ti 100 a ribo a pisos manipod iti gobierno national malaksid pay ti 100 a ribo a pisos nga ited met ti lokal a gobierno.
Inbatad ni Bunalade a dagiti kwalipikado a makaawat kadagiti nasao a benepisyo ket dagiti residente ken agnanaed a mismo ditoy ciudad ti Laoag.
