LAOAG CITY – Inbatad ni Engr. Ma. Teresa Bacnat, ti mangidadaulo ti provincial agriculture office nga addan ti 60% ti nairaep a pagay ditoy probinsya.
Inbatad na a daytoy ket nababbaba nu ikompara kadagiti naglabas a cropping season.
Kuna na a kangrunaan a nakaapektar iti panagraep ti pagay ket agkur-kurang a tudo agraman tin angina a krudo ken abono.
Mainaig iti daytoy, inpakaammo ni Bacnat a basar iti monitoring na kadagiti agturturong iti opisina da, adon dagiti nagmula iti high value crops imbes a pagay.
Inbunannag na a napintas met daytoy nga addang tapno saan a maibos ti ddduma nga agricultural products ken mamulaan latta dagiti lugar a saan a rain fed wenno agdepdepende iti danom manipod iti tudo.
Immunan nga inpakaammo ni Bacnat nga umabot iti 66,000 nga ektarya ti talon ditoy probinsya.
Innayun na a kangrunaan met a naraepan ket dagiti pagtalonan kadagiti ili iti daya a paset ti Ilocos Norte.
