LAOAG CITY – Addan 9,363 a residente ditoy siudad ti Laoag ti nabakunaan kontra iti covid-19.
Daytoy ti inpakaammo ni Mayor Michael Keon kabayatan ti naiyuswat a press conference iti city auditorium ditoy siudad.
Kuna ni Keon a manipod iti nasao a bilang ket 5,338 dagiti nakaawat ti first dose idinto a 4025 ti nakaawaten iti secon dose.
Kabayatanna, inbatad ni Keon a saan pay a karaman ditoy ti 450 a nabakunaan iti naglabas a dua nga aldaw.
Immunan nga inpakammo ti mayor nga adda ti simmangpet ditoy siudad a 4,800 doses ti Johnson & Johnson’s Vaccine ken daytoy ti mausar para iti maikatlo a mega vaccination.
Mainaig iti daytoy, inbatad ti mayor a dagus a maibunong dagiti bakuna gapu ta ita a bulan ti expiration daytoy.
Kabayatanna, saan met a naliklikan ni Keon ti nangsungbat kadagiti kritiko ti administrasyon na.
Inpetteng na nga agtultuloy ken ikarikarigatan ti local a gobierno ti pannakabakuna dagiti residente ditoy siudad ti Laoag.
