LAOAG CITY – Inpetteng ni Miss Mylene Pascual, ti mangidadaulo iti City Environment and Natural Resources Office nga addan dagiti namulta a residente ditoy ciudad ti Laoag a nagibelleng ti basura na iti saan nga umiso a lugar.
Kunana nga adda dagiti nagturongen iti opisina da a nangala ti photocopy ti nagbayadan dagiti namulta iti treasurer’s office tapno maala da met ti benepisyo da.
Inpakaammo na nga amin a makolektar da a multa ket agderetso iti general fund iti gobierno lokal a mausar kadagiti nagduduma a proyekto ken aktibidad ditoy ciudad.
Immun-una iti daytoy, inpetteng ti City Environment and Natural Resources Office nga adda ti agdama nga ordinansa ti gobierno lokal para iti pannakamulta dagiti agibelleng ti basura na iti nagduduma a lugar.
Inpalgak na nga adda dagiti nadutukan nga indibidual nga agmonitor no sadinno a no adda ti makita da nga agibelleng iti saan nga umiso a lugar ket ipaayan da a dagus ti citation ticket.
Innayon na a kas gunguna dagiti makatiliw ket 50% manipod iti multa a bayadan dagiti maseknan ti maipaay kadakuada idinto a ti 50% ket maited iti gobierno lokal ditoy ciudad.
