LAOAG CITY – Inbatad ni Agent Lorie Agunat, Barangay Drug Clearing Officer III iti PDEA nga addan ti 376 a barangay a maibilang a drug cleared ditoy probinsya.
Segun kenni Agunat, adda pay ti 149 a drug affected barangay ti probinsya.
Inbatad na nga agtultuloy met latta ti proseso dagiti barangay kadagiti nagduduma nga ili ken ciudad para iti panagbalin da a drug cleared barangay kas iti Pasuquin, Pinili, ciudad ti Batac ken Laoag.
Kunana a ti sumagmamano a rason no apay a saan pay a drug cleared barangay dagitoy ket ado ti nakalista a drug pusher no sadinno ket nasken a dumalan da iti Bahay Silangan Reformation Program.
Mainaig iti daytoy, kunana a ti kangrunaan a masapol para iti panagbalin a drug cleared barangay ket ti listaan dagiti nagturpos iti Intervention Program wenno ti Community Based Drug Rehabilitation Program, kasta pay ti kumpleto ti documentations nga imanmandar ti DILG, documentation requirement a dawaten ti CHO/MHO, Executive Order ti Drug Abuse Council ken nasken met nga adda ti sustainability program.
Inpalgak na pay a masapol a dumalan iti drug test dagiti drug surenderee.
Kabayatanna, kuna ni Agunat nga addan ti 8.31 grams a shabu a nakumpiskar da iti second semester idinto nga iti marijuana ket 36.19 grams manipud kadagiti drug personalities a natiliw.
