LAOAG CITY – Inpakaammo ni Agent Farlyne Vinluan iti Philippine Drug Enforcement Agency ditoy probinsya nga addan ti 411 drug cleared barangay iti intero nga Ilocos Norte.
Mainaig iti daytoy, kuna na nga adda ti nabatbati a 114 a barangay dagiti nagtalinaed nga apektado iti iligal a droga.
Inbatad na a kangrunaan kadagiti saan pay a maibilang a drug cleared barangay ket sakop iti ili ti Paoay, siudad ti Batac ken ditoy Laoag City, Pasuquin pakairamanan ti Sarrat.
Immuna iti daytoy, kuna ni Vinluan a naiyuswat ti coordination meeting iti nagbaetan ti Provincial Drug Enforcement Agency ken dagiti opisyal ti Ilocos Norte Police Provincial Office pakairamanan dagiti chief of pulis dagiti nagtalinaed a drug affected barangay.
Inpakaammo ni Vinluan a ti kalikagum ti nasao a taripnong tapno maamoan ken masolusyunan ti agtultuloy nga aktibidad nga adda ti pakainaigan ti iligal a droga kadagiti maseknan a barangay.
Rumrumuar a ti makitkita a rason ti Provincial Drug Enforcement Agency iti panagtalinaed dagiti drug related activities iti sumagmamano nga ili ditoy probinsya ket ti kaawan ti bahay silangan.
