LAOAG CITY – Inpakaammo Mr. Cipriano “Perry” Martinez, Acting General Manager ti Ilocos Norte Electric Cooperative (INEC) nga addan ti 50 a porsiento ti naisublin iti serbisio ti kuriente ditoy probinsia gapu iti iduduprak ti Bagyo Marce.
Segun kenkuana, dagus a nangbukel ti kooperatiba ti grupo para iti pannakaisubli ti serbisio ti kuriente kadagiti nagduduma nga ili ditoy probinsia.
Inlawlawagna a dakkel ti nagbalin nga epekto ti Bagyo Marce iti backbone system-da isu nga adu kadagiti konsumer ti koooperatiba ti naapektaran kadagiti linya ti kuriente.
Inbatadna nga apaman a simmayaat ti sasaaden ti panawen ket dagus a pinagtignayna dagiti adda iti babaenna nangruna kadagiti linemen nga isu ti napan nangkita kadagiti lugar ditoy probinsia nga awan ti kurientenna.
Mainaig iti daytoy, kuna ni Martinez nga as of 10pm iti Nobiembre 8 ket in-inoten a maisubli ti serbisio ti kuriente dagiti konsumer.
Iti Area 1, iti ili ti Dingras ket addan ti 53% ti naisublin iti serbisio ti kuriente, 54% iti Sarrat South of the River, 23% iti ili ti Solsona, 39% iti ili ti Marcos idinto nga awan pay ti kuriente iti ili ti Nuevara Era.
Iti Area 2, iti Laoag City North of the River ket addan ti 65% ti naisublin iti serbisio ti kuriente ken 30% iti ili ti Bacarra, 25% iti ili ti Pasuquin.
Iti Area 3, iti siudad ti Batac ket addan ti 49% ti naisublin iti serbisio ti kuriente, 52% iti ili ti Currimao, 43% iti ili ti Badoc, 41% iti ili ti Pinili ken 54% iti ili ti Paoay.
Iti Area 4, iti Davila, Pasuquin ket addan ti 20% ti naisublin iti serbisio ti kuriente, 15% iti ili ti Burgos, 10% iti ili ti Bangui idinto nga iti ili ti Dumalneg, Pagudpud ken Adams ket agpapada nga awan pay ti kurienteda.
Iti Area 5, iti ili ti Vintar ket addan ti 60% ti naisublin iti serbisio ti kuriente, 98% iti Sarrat North of the River, 60% iti ili ti Piddig ken 33% iti ili ti Carasi.
Iti Area 6, iti ili ti San Nicolas ket addan ti 41% ti naisublin iti serbisio ti kuriente, 39% iti Laoag City South of the River ken 100% iti Brgy. Baay iti siudad ti Batac.
Kabayatanna, dimmawat ti naan-anay a pannakaawat ti Acting General Manager ti Ilocos Norte Electric Cooperative kadagiti amin a konsumer gapu iti kinaawan ti kurienteda ngem inpasingkedna nga ikarkarigatanda a maisubli ti serbisio ti kuriente iti kabiitan a panawen.
